Toshkent, O‘zbekiston (UzDaily.uz) — 2025 yil oxirigacha Toshkent shahrida foydalanish muddati tugagan 452 ta eskirgan lift almashtirilishi rejalashtirilgan. Bu haqda shahar hokimi tomonidan tegishli qaror qabul qilindi.

Yangi liftlar “OSTEN” brendi ostida “Texnopark” quvvatlarida ishlab chiqariladi. Hozirgi kunda Toshkentdagi ko‘p qavatli uylarda 9101 ta lift mavjud bo‘lib, ulardan 2042 tasi (22,4%) foydalanish muddatini o‘tab bo‘lgan. Ushbu yangilash dasturi doirasida 452 ta lift almashtiriladi, bu esa eskirgan liftlarning 22,1 foizini tashkil qiladi.

Eski liftlarning o‘rnini egallaydigan yangi zamonaviy liftlar xavfsizlik va energiya tejamkorligi bo‘yicha yuqori standartlarga javob beradi.

Afzallik foydalanish muddati 25 yildan oshgan, texnik talablarga javob bermaydigan va xavfsizlik darajasi past bo‘lgan liftlarga beriladi.